Woosch - Pannhas met Himmel-un-Ääd-Stamp

Zubereitung

• Als Eetstes ze don

  1.Dä Ölligsköpp schälle. Dä Öllig un dä Speck würfele un in enem huh Pott anbrode. In dä Pott müsse noh janz vill Saache erin jon, hä sullt äch jroß sin. Zo dä Speck dä Bröh geeße. Fleete in ene Büggel don, dazo jevve un mit Salz, Pepper un Meierönche wööze. 10 Min. koche un dä Fleete eruss nemme. Dä Blot- un dä Levverwoosch uss dr Huck striche, jet klein maache un 10 Minutte in dä Bröh koche.

• wigger geiht et domet

  2.Bochweizemähl dazo jewwe un rühre, rühre, rühre un kooz opquelle losse. Dat mäht Maue! Wä nit genog rührt, kritt Klümpcher. Un nit schummele un Wasser dodebei don, sunst weed et nit fess genog. Dä ganze Mass en ene Kaasteform oder en Kump jevve un över Naach kal wäde losse.

• am näächste Dag

  3.Ädäppele und Äppele schälle. Kään uss dä Äppele eruss schnigge un allebeids klein schnigge un 10 Minutte in Salzwasser koche. Avgeeße mit, Meierönche, Beschot un Kaniel wööze. Milch un Botter dobei don un jot stampe. Pannhas en Schieve schnigge (dodeför es mer ene Kaasteform leever) un kooz vun beide Sigge in Botter anbrode.

• Die ungewöhnlichen Vokabeln

  4.Ölligsköpp = Zwiebeln ; Fleete = Nelken : Meierönche = Majoran ; Beschot = Muskat ; Kaniel = Zimt

• Un zo joter Letz ene Kamellche - Saat einfach Pannhas

  5.Hä hatt et jo jeahnt. Ävver hä wor trotzdäm metjekumme. Dat hatt hä jetz dovun. Un dat alles nur, weil et Lisbeth noh bal zwanzich Johr sing ahl Schullfründin Züff widderjetroffe hät! Dat Züff hatt inzwesche jehierot - irjendseine neurich Vun on Zo - un hatt dat Lisbeth metsamp "Gatten" für diese Sonndaach enjelade. Su kom et, dat Nettekovens Ewald jetz mem Lisbeth en ener jroße Villa en Marieburg om Kanapee soß un stinkwödich wor.

  6.Denn zickdäm erus wor, dat Nettekovens Ewald sing Brütcher als Elektriker verdeene dät, jov et vum däm finge Här Vun un Zo andauernd blöde Sprüch. Bei de Zijarre ("´Die koste sibbefuffzich dat Stöck, ävver dat ess mer en jode Zijar wäät!"), beim Wing ("Dat ess en Spätlese uss Frankreich. Nit janz bellig, kann ich Üch sare!") un dann sujar beim Esse: Et jov Fasan, dän dr Hushär en singem eijene Jagdrevier erlegt hatt.

  7."Secher - et es e dür Hobby, ävver man jünnt sech jo söns nix", tönten hä, "un usserdäm kann ich Üch esu ens ene Fasan anbede - sujet kris do zohos secher nit off ze sin, oder Lisbeth?" Dat wor dä Punkt, an däm et Nettekovens Ewald endjültig zovill wood: "Dat es wahr" saat hä en singer Wot beinohe Huhdeutsch, "Fasan jibt et bei uns wirklich eher selten - mir bevorzugen Has! Wenn ihr nächste Woch zo uns kutt, dann serviere mer Üch e Häsje, an dat ihr noch lang denke werdet!" "Dat ess e Woot", reff dem Züff singe Mann, "mir freue uns ald op nähxte Sonndaach!"

  8.Zohuss en Sölz dät Nettekovens Ewald singe Temperamentsuusbruch ärch leid. Eetstens, weil hä dä Kääl zo sich noh Hus enjelade hatt, zweitens wäje däm has. Weil, woher sollt hä so e Dierche krieje? Hä hatt noch nit ens e Jewehr, un selvs wenn dat anders jewäs wör: Hä kritt et nie övver et Hätz, irgjendwen oder irjendjet ömzebringe. Also ene Has kaufe! Doch wie en vürsechtije Recherche bei dr Metzjerei Uhlenbruch op dr Vringsstroß erjov, wor su ene Has wirklich utopisch dür. Un jetz?

  9.Zojevve, dat mer sich keine Has leiste kunnt un Frikadelle serviere? Öm nix en dr Welt, nit bei däm Kääl! Villeich wor et jo en Möglichkeit, e Kning als Has zo verkaufe... Doch et Lisbeth dät bei der Idee mem Kopp schöddele: "Deit mer leid, Ewald, ävver domet fälls do op - e Kning schmeck janz anders wie ene Has!" Ävver die Idee lässt Nettekovens Ewald nit mieh loss. Mer mööt sujet wie ene "Potjomkin'sche Has" friemele, irjendjet, wat wie Has ussüht un wie Has schmeck, ohne Has zo sin....

  10.Doch wat Nettekovens Ewald en singer Köch och ussprobiere dät - et soch nit uss wie Has un esu schmecke dot et schon ens janit. Dat Lisbeth wor schon janz usser sech wäje dä Blamasch, doch da hatt dr Ewald plötzlich en Idee: "Lisbeth", saat hä, "mir hatte doch vürjestern dat Esse met dä Bloot- un Levverwoosch kreiert, wat eijentlich ärch jot jeschmeck hät. Un wat däm Züff singe Mann kann, dat kann ich ald lang. Pass ens opp wat mer maache..."

  11.Wie am Sonndaach dat Züff met singe Mann kom, dät Nettekovens Ewald en Kaasteform met ener Fleischmasse op dr Desch stelle. "Dat ess ävver keine Has, " stellt däm Züff singe Mann fess un laacht sich halv kapott, "jev et zo: Íhr hatt de Schnüss zo voll jenomme!" Nettekovens Ewald schöddelten würdevoll dr Kopp: "Ihr hat bloß kei Ahnung! Dat ess Patete Du Lapin!" "Wie bitte? Wat ess dat?" " Patete du Lapin! Hasenpastete! Saat bloß, dat kennt ihr nit!? Dat ess en französische Tilikatess!"

  12.Däm Züff singe Mann dät misstrauisch probeere: "Dat schmeck ävver och nit noh Has!" Nettekovens Ewald dät jriene: "Ich han üch jo och ene Has versproche, an den ihr noch lang denke dot! Da kann dä doch nit wie ene stinknormale Has schmecke - schließlich sid ihr ene Mann vun Welt, un Üch kann mer nur met jet janz besonderem verwöhne!" "Dat ess wohl wohr", saat dem Züff singe Mann jeschmeichelt, "also Kompliment für Ühr - wie heißt dat doch noch ens?" "Saat einfach Pannhas, dat löß sich leichter merken." Un domet dät Nettekovens Ewald singem Lisbeth zokniepe.

  13.Ich jläuv nit, dat et esu in äch passeet ess, ävver dä fies löstije Verzäll han ich jefunge bei: "Kölsch für ze müffele" vun Krautmachers Henning

• Rezept melden

  Rezept bewerten

  Rezept von andrea21
  vom 06.03.2012

  
• Weiterlesen